जि.प. शाळा सोरापाडा येथील विद्यार्थ्यांची गुरुद्वाराला भेट; 'हिंद दी चादर' अभियानांतर्गत गुरु तेग बहादूर साहेबांच्या बलिदानाला उजाळा!

 अक्कलकुवा: नुकतेच जिल्हा परिषद शाळा सोरापाडा येथे 'हिंद दी चादर' अभियानांतर्गत एका विशेष उपक्रमाचे आयोजन करण्यात आले होते. या उपक्रमाचा एक भाग म्हणून शालेय विद्यार्थ्यांना स्थानिक गुरुद्वाराला भेट घडवून आणण्यात आली. या भेटीदरम्यान विद्यार्थ्यांना भारतीय संस्कृती, त्याग आणि शौर्याचा वारसा जवळून अनुभवता आला. 

गुरूंचे मार्गदर्शन आणि वार्तालाप

गुरुद्वारा सोरापाडा येथील आदरणीय गुरूंनी विद्यार्थ्यांशी संवाद साधला. त्यांनी परमगुरू तेग बहादूर साहेबजी यांच्या जीवनावर प्रकाश टाकत, त्यांनी मानवता आणि धर्माच्या रक्षणासाठी दिलेला सर्वोच्च त्याग आणि त्यांच्या महान कार्याची सविस्तर माहिती दिली.

"गुरू तेग बहादूर साहेबजी यांनी दिलेला शांतता आणि बलिदानाचा संदेश आजही तितकाच प्रेरणादायी आहे," असे विचार यावेळी गुरूंनी व्यक्त केले.

भक्तीमय वातावरण आणि सहभाग

या प्रसंगी केवळ माहितीच देण्यात आली नाही, तर शिक्षक, विद्यार्थी आणि गुरुद्वारातील गुरुजींनी एकत्रितपणे प्रार्थना केली. या भक्तिमय वातावरणामुळे विद्यार्थ्यांमध्ये एकात्मतेची भावना वृद्धिंगत झाली. या कार्यक्रमाला शाळेतील सर्व शिक्षक, गुरुद्वाराचे पदाधिकारी आणि परिसरातील समाज बांधव व भगिनी मोठ्या संख्येने उपस्थित होत्या.

निबंध लेखनातून उमटले विचारांचे प्रतिबिंब

गुरुद्वारा भेटीनंतर गुरूंनी सांगितलेली माहिती आणि गुरुद्वारातील अनुभव विद्यार्थ्यांनी आपल्या शब्दांत निबंधाच्या माध्यमातून मांडले. या उपक्रमामुळे विद्यार्थ्यांच्या लेखन कौशल्याला वाव मिळालाच, शिवाय ऐतिहासिक मूल्यांची रुजवणूकही झाली