प्राथमिक आरोग्य केंद्र, दौलताबाद येथे उपसंचालकांची भेट – सिकलसेल अभियानाचा सविस्तर आढावा..

 उपसंचालक डॉ. कैलास बाविस्कर, आरोग्य शिक्षण व संपर्क विभाग, पुणे यांनी दिनांक १४ फेब्रुवारी २०२६ रोजी प्राथमिक आरोग्य केंद्र, दौलताबाद येथे भेट देऊन केंद्रातील कामकाजाचा सविस्तर आढावा घेतला.

भेटीदरम्यान केंद्रातील विविध विभागांची पाहणी करण्यात आली. अधिकारी व कर्मचाऱ्यांसमवेत सविस्तर चर्चा सत्र घेऊन विविध अडचणी, मनुष्यबळाची उपलब्धता, सेवा सुविधा तसेच चालू कामकाजाची प्रगती यावर चर्चा करण्यात आली.

सिकलसेल अभियानाचा विशेष आढावा

सिकलसेल संदर्भातील लाभार्थी तपासणी, प्रलंबित प्रकरणे, फॉलो-अप कार्यवाही व नोंदवही व्यवस्थापन याबाबत सखोल माहिती घेण्यात आली. प्रयोगशाळा तंत्रज्ञांकडून सिकलसेल तपासण्यांच्या अंमलबजावणीची माहिती घेत गुणवत्तापूर्ण व वेळेत सेवा देण्याबाबत आवश्यक सूचना देण्यात आल्या.

IEC व जनजागृती उपक्रमांवर भर

वैद्यकीय अधिकारी, आरोग्य कर्मचारी व आशा स्वयंसेविका यांच्याशी संवाद साधून सिकलसेल विषयक जनजागृती अधिक प्रभावीपणे राबविण्यासंदर्भात मार्गदर्शन करण्यात आले. अहवाल सादरीकरण, नोंदवही अद्ययावत ठेवणे व प्रत्यक्ष लाभार्थी संपर्क वाढविणे यावर विशेष भर देण्यात आला.

विशेष निरीक्षणे

केंद्रात टीमवर्कच्या माध्यमातून कामकाज समाधानकारकपणे सुरू असल्याचे दिसून आले. माता बैठक व UHNC बैठका नियमितपणे आयोजित होत असल्याचे आढळले. जनजागृती उपक्रमांमध्ये आशा सेविकांचा सक्रिय सहभाग उल्लेखनीय आहे. PEC (Patient Education & Counselling) उपक्रम प्रभावीपणे राबविला जात असून WhatsApp समूहाद्वारे अंतर्गत संवाद सुरळीतपणे चालू आहे. स्वच्छता व्यवस्थेसाठी अतिरिक्त मनुष्यबळ उपलब्ध करून देण्याची आवश्यकता व्यक्त करण्यात आली.

प्राथमिक आरोग्य केंद्र, दौलताबाद येथील कार्य समाधानकारक असल्याचे नमूद करत सिकलसेल अभियानाबाबत अधिक व्यापक व लोकाभिमुख जनजागृती राबविण्याच्या सूचना देण्यात आल्या.

यावेळी संस्थेतील डॉ. परमेश्वर वाकतकर, आरोग्य कर्मचारी, प्रयोगशाळा तंत्रज्ञ, बीसीएम, आशा स्वयंसेविका तसेच इतर कर्मचारी उपस्थित होते.