अजित पवार विमान अपघात: पुतण्याच्या मृत्यूची बातमी शरद पवारांना कशी समजली?

 बारामती: महाराष्ट्राचे उपमुख्यमंत्री आणि राष्ट्रवादी काँग्रेसचे ज्येष्ठ नेते अजित पवार यांचे आज (२८ जानेवारी) सकाळी बारामती येथे विमान अपघातात दुर्दैवी निधन झाले. या घटनेने संपूर्ण महाराष्ट्रावर शोककळा पसरली आहे. या भीषण अपघाताची बातमी अजितदादांचे काका आणि त्यांचे राजकीय गुरू शरद पवार यांना कुठे आणि कशी समजली, याबाबतची माहिती आता समोर आली आहे.

शरद पवार 'सिल्व्हर ओक'वर मिळालेल्या माहितीनुसार, आज सकाळी जेव्हा ही दुर्घटना घडली, तेव्हा शरद पवार मुंबईतील त्यांच्या 'सिल्व्हर ओक' या निवासस्थानी होते. वयोमान आणि प्रकृतीच्या कारणास्तव शरद पवार सध्या मोजक्याच कार्यक्रमांना उपस्थित राहत असतात. सकाळी ९ वाजण्याच्या सुमारास बारामतीहून आलेल्या या धक्कादायक बातमीने सिल्व्हर ओकवर एकच शांतता पसरली. आपल्या पुतण्याच्या अशा अचानक जाण्याने पवार कुटुंबीयांना मोठा मानसिक धक्का बसला आहे. वृत्त समजताच शरद पवार तातडीने बारामतीकडे रवाना झाल्याचे समजते.

सुप्रिया सुळे आणि सुनेत्रा पवार दिल्लीत संसदेचे अर्थसंकल्पीय अधिवेशन सुरू असल्याने खासदार सुप्रिया सुळे आणि अजित पवार यांच्या पत्नी खासदार सुनेत्रा पवार या दिल्लीत होत्या. अपघाताची माहिती मिळताच त्या दोघीही तातडीने विशेष विमानाने महाराष्ट्राकडे रवाना झाल्या आहेत. दिल्लीतील राजकीय वर्तुळातही या घटनेने हळहळ व्यक्त केली जात आहे.

नेमका अपघात कसा झाला? अजित पवार हे मुंबईहून बारामतीला एका खाजगी विमानाने (Learjet 45) निघाले होते. सकाळी ८.५० च्या सुमारास बारामती विमानतळावर लँडिंग करत असताना विमानाचा अपघात झाला. तांत्रिक बिघाडामुळे विमान रनवेवरून घसरले आणि त्याला आग लागली. या दुर्घटनेत अजित पवार यांच्यासह विमानातील इतर चार जणांचाही मृत्यू झाला आहे.

अजित पवार यांच्या निधनामुळे महाराष्ट्राच्या राजकारणात कधीही न भरून येणारी पोकळी निर्माण झाली आहे. स्पष्टवक्तेपणा आणि कामाचा प्रचंड उरक असलेला नेता हरपल्याची भावना सर्व स्तरांतून व्यक्त होत आहे.